هيدا الكتاب صعب. أول ما بلشت فيه طبعاً حسيت بالفرق بينه وبين "باب الشمس". الكتابين بينحكوا من وجهة نظر الشخصية الأساسية بس الأولى بتحكي قصة شعب من عينين شخص والتانية بتحكي قصة شخص من عينيه.
المهم بالأول ما حسيت هيدي الرواية بمستوى اللي بتذكره من "باب الشمس"، وبمرحلة معينة استفزني التبرير الشخصاني لظاهرة الإغتصاب مثلاً (متل ما كان عم يستفزني بعدد من الكتب اللي قريتها مؤ خراً، Memoires of My Melancholy Whores، Love in the Time of Cholera) بس هيدا حديث طويل ما بيقتصر على الياس خوري ولا رواية يالو بشكل خاص.
بس شوي شوي فتت بجو الكتاب وبلشت انقهر مع يالو وحس ببهدلته. وهيدا اللي حلو بأسلوب الياس خوري، هيدي مش رواية سهلة، هيي من الروايات اللي بتحطمك مع ابطالها، بتتعاطف معه وبتحس بعجزه وبتنذل معه وبتتف على الدنية عنه. مش رح قول اكتر من هيك بس الكتاب فعلاً ما بيرحم ومش رح يبسطك.
ومن الإشيا اللي يمكن لازم ينتبهلا الواحد قبل ما يجيب هالكتاب إنو وصف التعذيب كتير صوري، ما في وصف تصويري للإغتصاب، في وصف جنسي بس مش الإغتصاب. بس صور التعذيب كتير قاسية.